EUVER 'T JOCUS MUSEUM
Midde in ’t Venlose Kloosterkwartier, naeve Domani, is ’t Jocus Museum te vinde. In ‘t hert van de historische binnestad is ‘t ein unieke locatie wao bezeukers waere ôndergedompeld in de riéke historie van de Venlose vastelaovend en van Jocus as aldste vastelaovendvereiniging van Nederland in ’t biézonder.
In ‘t Jocus Museum
In ’t Jocus Museum kump de vastelaovend tot laeve. In ein vaste kôlleksie vertelle originele kostuums, ônderscheidinge, foto’s, films en nog miër ‘t verhaol van ‘t unieke Venlose volksfees.
Ein rondleiding door ’t Jocus Museum deurt ongeviër éin oor en kin aangevöld waere mit ein filmveurstelling in ôs auditorium.
Laot ôg verwôndere door ein van ôs ervare museumgidse, die ôg op eur eige wiéze alles kinne vertelle euver de Venlose vastelaovend door de jaore haer.
Wilt geej Museumgids waere?
‘t Jocus Museum is opzeuk nao enthousiaste minse as Museumgids bezeukers wil rondleinde.
Bisse bekind mit de Venlose vastelaovend en Jocus en vindse ’t leuk um bezeukers ein uniek bezeuk te gaeve? Dan zien weej opzeuk nao dich!
In ôs museum kump de historie van de Venlose vastelaovend tot laeve via originele kostuums, ônderscheidinge, foto’s, films en nog miër. Det alles is vasgelag in de Museumhandleiding veur gidse. Zoë kint geej op ôg eige wiéze alles kinne vertelle aan ôs bezeukers.
Samewerking
‘t Jocus Museum is geliërd aan Venloosch Vastelaoves Gezelschap Jocus, ‘t aldste vastelelaovesgezelschap van Nederland opgerich in 1842. Jocus haet as doel um de Venlose vastelaovescultuur instand te halde en te bevordere door ‘t organisere culture aktiviteite die dit meugelik make.
Weej zien gruuëts op de samewerkingsverbande mit ‘t Limburgs Museum, Museum van Bommel van Dam en Venlo Partners en andere instanties.
Organisatie
Vastelaovend viere weej same. ‘t Jocus Museum is geäöpend in jannewarie 2017 en wuurt behiërd door de Stichting Venlose Volkscultuur Museum.
‘t Museum wuurt volledig gedreijd door vreejwilligers. De Stichting Venlose Volkscultuur Museum is ein ANBI erkinde instelling (publicatie).
